2 JON KUIMP TEPA IK KɄⱠ
Ya Buk Ei Nga Puⱡ Ei:
Kraist nga puⱡ ei, tᵾpa ora ndupa, mon ei rurum. Ik kupa ei kᵾn, wamp numan ngui uⱡ raⱡ. Ik mbo wu kol ropa mbᵾ nga, tᵾk mendᵾk muⱡᵾi!Ya Buk Ei, Nam Ndi Rurum:
Ya buk ei, nombuⱡa rung wu Jon ndi rurum.Mon Ropa Nam Ngurum:
Ya mon ei ropa, elim nga mbi ropa titim amp ei kᵾn elim nga kangambuⱡa mbᵾ kᵾn ngurum.Ui Nant Ila Rurum:
Mon ei, pana 85 mba 95 AD ei nga ruk ting ila moⱡpa, mon ei rurum, ei Episis kona ila.Ik Ronduⱡ: 2 Jon 1:6
Got nga keta teng ndui uⱡ ei ndi, wamp numan ngui uⱡ mbᵾ etmba. Keta teng uⱡ ei, kuimp tek mondᵾk pᵾtᵾng ei mel teng nduk, wamp numan nguk muⱡᵾi!IK PENG KɄⱠRump1:1-1:3 - Mon ti akil tepa, Jon ndi, ropa ngurum1:4-1:13 - Ik kupa ni, uⱡ ei kᵾn, wamp numan ngui uⱡ raⱡ
2 John
Mon Ti Akil Tepa, Jon Ndi, Ropa Ngurum
1Na Jon, Got nga rapa tenda ila rᵾp wu ei ndi, enim Got nga kᵾmp ropa titim amp ei kᵾn, nim nga kangambuⱡa mbᵾ kᵾn, mon rop ngont. Na ik kupa ei, pilip tᵾp enim kᵾn, numan ngump mor. Ik kupa ei, pilik mbi ndui nandᵾrmᵾn wamp mbᵾ ndi, enim kᵾn numan ngurmin ku. 2Ei nambuⱡ emel, ik kupa ei, tᵾn kᵾn pimba ei nga mint petᵾm. 3Got Tipam kᵾn, elim nga Kangᵾm Jisas Kraist raⱡ nga wamp pol ti uⱡ na, wamp kont kul uⱡ na, moⱡpa kundi uⱡ ei kᵾn, wote wamp numan nga uⱡ na, ik kupa ni uⱡ mbᵾ, tᵾn kᵾn, kan piyangga!Ik Kupa Ni, Uⱡ Ei Kᵾn, Wamp Numan Ngui Uⱡ Raⱡ
4Na numan kai ti, punt ei, nim nga kangambuⱡa mat ik kupa ei, pilik koip purmin mbᵾ, Got Tipam nga man ik pilik tᵾtmin. 5Akup amp aiya, nim waldᵾnt, tᵾn kᵾn wamp mbᵾ kᵾn, wamp numan ngui uⱡ ei kan piyangga! Ik ronduⱡ kont ti, nim kundᵾp ni nanᵾnt. Wote unt kuimp tepa pitmin ik ni ku kundᵾp nᵾnt. 6Got nga keta teng ndui uⱡ ei ndi, wamp numan ngui uⱡ mbᵾ etmba. Keta teng uⱡ ei, kuimp tek mondᵾk pᵾtᵾng ei mel, teng nduk, wamp numan nguk muⱡᵾi! 7Nambuⱡ emel, wamp ik kol rui wu minal ekit ok puk, muⱡ uⱡ mbila andᵾk kᵾn, Jisas Kraist ei, mᵾi kona mana omba, mbo wu rurum ni nga nᵾk, para ndᵾi nandᵾk. Wamp mbᵾ ndi, ik kol rok, Kraist nga el rui wamp rarmᵾn. 8En enim rᵾp etᵾi! Enim kongun etmin mel ei nga mel mbᵾ, ti kawa ndui nᵾndangga, wote enim nga mel mbᵾ, kump kᵾm ting. 9Wamp nam ti ndi, Kraist nga ik mbo inditim ei, tᵾpa mbuⱡ ngum ndam, Got kᵾn muⱡi nambᵾrᵾm. Wote, wamp nam ti ndi, Kraist nga ik mbo inditim ei, pilpa tᵾm ndam, Got Tipam kᵾn, elim nga Kangᵾm raⱡ, tᵾpa tepa morum. 10Wamp nam ti ndi, nim nga mang kona ila, Kraist nga ik mbo inditim ik ei, mepa ui nawᵾm ndam, wu ei, rawe etkᵾn ti nᵾti. Wote, moⱡpa kundi uⱡ ei, nim kᵾn piyangga ni nᵾni ku. 11Wamp nam ti ndi, wamp ei nga kongun kit etᵾm mbᵾ kᵾn, rawe etpa tᵾm ndam, elim nga kongun kit mbᵾ, tᵾk tenda ndukᵾⱡ itinggil.Ik Kᵾⱡ Nimba Pora Ndurum
12Na ik ou ndup mat, nim kundᵾp nimp. Mon rop ngump nint ik ei, peipa ila, kapⱡa iti natᵾmba. Ei nga, pilip int omp nim kᵾn, kuimp keta kandpᵾⱡ rᵾp ropᵾⱡ moⱡpᵾⱡ kᵾn, ik mat nim kundᵾp namba, tᵾl nga numan ei wang minal nangga. 13Nim nga numan mul amp angᵾna ei nga kangambuⱡa mbᵾ ndi, nim kᵾn, rawe etᵾk, ik kai mat nᵾk mundᵾnmin!
Copyright information for
MED